تسبیح

                                                       (سائیں   سُچّا)

 

تمام  دِ  ن   ساتھ  والے  اور  رفیق  کے گھر  میں  گہماگہمی  رہی  تھی۔ 

ناصرہ  کا  بیاہ  دوبرس   پہلے  ہوا  تھا، اور  پھر وہ جو  سالوں   سال  ساتھ  رہے  تھے   پردیس  میں ایک  مولوی  کے  چند   جملے  کہنے   پر  ایک  دوسرے  سے  بچھڑ  گئے۔  نہ  صرف  بچھڑے  بلکہ  آپس  میں  غیر  ہو  گئے۔   اور  اب  جب  وہ  دو  دِن  پہلے    میکے   واپس  آئی  تو  اُس  نے  پردہ   کرنا    بھی  شروع  کر دیا  تھا۔  ظاہر  ہے   کہ  اگر  بہاولپور   والوں  کو  لڑکی  دی تھی   تو  پھر  یہ  ہونا   ہی  تھا۔  شادی  کی  خبر   پر  رفیق  کا  دِل  تو  بہت  جلا  تھا  لیکن  اُنیس  برس  کے  جلتے  دِلوں  کی  کون  پرواہ  کرتا ہے۔  دِل  جلتا رہا،  بیاہ   ہو  گیا اور  ایک  غیر مرد رفیق  سے  زیادہ  ناصرہ  کے  قریب  ہو  گیا تھا۔ اس لحِاظ  سے  قادر  کا  نام  بھی  درست تھا۔

رات  کے  دو  بج   رہے  تھے۔   انتہائی  مزاحمت   کے  باوجود     رفیق  پر  نیند کی  یلغار مسلسل جاری تھی، لیکن  وہ  سو  نا  نہیں چاہتا   تھا کیونکہ  اُس  نے  قادر سے   وعدہ  کیا تھا  کہ  وہ   اُسے صبح  چار   بجے  ہوائی  اڈے  پر  پہنچا دےگا۔ قادر اپنے  کاروبار  کے  سلسلے  میں  صرف  دو   دِنوں  کے  لئے  جرمنی  جا  رہا  تھا۔  کوٹھی   کے  صحن  سے  تمام  رنگ رلیاں  منانے  والے  غائب  ہو  چکے  تھے، باہر  والے  چولھے   میں  صرف  چند  کوئلے  اُس  کی  یادوں  کی  مانند دھیرے  دھیرے  سُلگ  رہے  تھے۔ بجائے اپنے  کمرے  میں  جانے  کے  جہاں   ساتھ  کے  کمرے  میں  بچوں والےمہمانوں  کا  ڈیرا    تھا   رفیق  نے  صحن  کی  پرلی  طرف   لائبریری   کا  رخ  کیا۔  بچپن  سے  ہی  یہ اُس کی  وہ  پناہ گاہ تھی  جہاں،   جب گھر  میں  بہت  شور  ہو،    وہ  چُھپا  کرتا  تھا۔    لائبریری، جس  کا   اوپر  والا    کمرہ  بوقتِ ضرورت  مہمان  خانہ  بھی  تھا،    میں  کتابوں    کے  علاوہ  چند  کرسیاں  اور   ایک  پلنگ بھی  پڑا   رہتا  تھا۔ رفیق  نے مہمان  خانے  میں   تازہ  ہوا  کے  لئے  کھڑکی   کو  کچھ  کھولا ، پلنگ کو  کھڑکی   کے  پاس  گھسیٹ  کر  اُس  پر  کھیس  بچھایا،  اور اپنے  سیل فون  پر  چار  بجے  کا  الارم  لگا  نے  کے  بعداُس  نے   بستر  پر لیٹ  کر  آنکھیں  موند  لیں۔   کمرے  میں  اب  ہلکی  سی  خنکی ہو  چلی   تھی۔ کچھ  دیر  بعد نیند  کی   آمد  شروع  ہو  گئی۔

اُن  کی  کوٹھی    اور  ناصرہ  کی  کوٹھی  کا  بنیادی  نقشہ  ایک  ہی  تھا، لیکن  آئینے  کے  عکس  کی  مانند  وہ  ایک  دوسرے  کی  الٹ  تھیں۔  کوٹھیوں  کے  درمیان   دس  میٹر  کا  فاصلہ  ہو  گا،  اور  اُُن  کے  بیچ  پودوں  کی  ایک  باڑ  لگی  ہوئی  تھی۔    ابھی  وہ  غنودگی  کے  عالم  میں  ہی  تھا  جب  کسی  کے  کراہنے  کی  آواز  سے   وہ  جاگ  سا  گیا۔  رفیق   خاموشی  سے  اپنے  پلنگ  سے  اُٹھا   اور  کھڑکی  کی  جانب  بڑھ کر   نیچے  جھانکا۔  وہاں  کوئی  نہیں  تھا۔  غور  کرنے  پر  اُسے  احساس  ہوُا  کہ  وہ  سسکیوں،  سبُکیوں  اور   کراہنے  کی  آوازیں  سامنے  والی  کوٹھی  کے اوپر  والے  کمرہ سے  آ  رہی  تھیں۔   آوزیں  غیر  مانوس  سہی  مگر  نہ  جانے  کیوں  اُس   کا منہ بالکل  خشک ہو  گیا  اور  اُسے   لگا  کہ  اُس کی  ٹانگٰیں  کانپ  رہی  ہوں۔ وہ  پیچھے ہٹ  جانا  چاہتا  تھا  مگر  کسی  بہت  طاقتور  مقناطیس  نے  اُس  کے  پیر  جکڑ  لیے  ۔  وہ   وہیں  کھڑا  اُن سنسنی خیز آوازوں   کو  سن رہا  تھا   جب اچانک  خاموشی  کے   چند  لمحوں  بعد   سامنے  والے  کمرے  کی  بتّی  جلی۔  اُس  نے  فوراً ایک  قدم  پیچھے  لیا،  لیکن  اُس  کی  آنکھیں  اُس  کھڑکی  پر  جمی  رہیں۔  قادر  غسل خانہ  کی  جانب  جا رہا  تھا۔  پھر  بہت  آہستہ  سے  ناصرہ  اُس  کے  سامنے  نمودار  ہوئی۔  ناصرہ  نے  صرف  بجلی  کی   روشنی  کا انتہائی  مہین  لباس  پہنا    ہُوا    تھا، جہاں   کوہِ  شیر  کی  دو   چوٹیوں پر  نور ِ  شباب  جلوہ  گر  تھا۔  ایک  لمحے  کے  لئے  ناصرہ  نے  آنکھیں  اُٹھا  کر  سامنے  والی  کھڑکی  کو  دیکھا،  ایک  عجیب  قسم  کی  مسُکان   اُس  کے  چہرے  پر  چھا ئی اور  پھر  بتّی   بجھا  دی  گئی۔ 

 

        رفیق  اور  ناصرہ  کی  مائیں  پکّی  سہیلیاں  تھیں،  اور  وہ  ایک  عرصہ  سے   سولینتونا   میں سکانس ویگن   پر ساتھ  ساتھ  ہی  رہ  رہے  تھے۔ پر سہیلیوں کے  اتنے  میل  جول  کے  باوجود   اُن  کے خاوندوں  کی  آپس  میں  گہری   نہ بن  سکی  تھی،  بس  اخلاقی  طور  پر  سلام   دُعا تھی۔ اصل  میں  رفیق  کے  والد ارتقاء  اور  تدبیرکے  قائل،   اور  ناصرہ  کے  والد  تخلیق اور   تقدیر   پر  یقین  رکھتے  تھے،  چناچہ  اُن  کی  زندگی  کی  پٹریاں  ساتھ ساتھ  چلتے  ہُوئے  بھی  آپس  میں  ملنے  سے  قاصر  تھیں۔

دو برس  پہلے   جب  ناصرہ  اپنے  والدین  کے ساتھ  گرمیوں  کی  چھٹیوں  میں  ملتان  گئی  تو  واپس  لوٹی  ہی  نہیں۔  پتہ  چلا  کہ اُس  کی  شادی  کر  دی  گئی۔ یہ  پہلی  مرتبہ  تھا  جب  رفیق  نے  اپنے  باپ  کو  ناصرہ  کے  والد  کے  نام  کے  ساتھ  لفظ  خبیث استعمال  کرتے  سُنا   تھا۔   اور  وہاں  پر  رہتے  رہتے ہی     اُن  بزرگوں  کے  درمیان کا   فاصلہ مزید بڑھ  گیا۔  رفیق  کا    دِل   تو بہت  تڑپا  تھا،  لیکن  اب  وہ  کر  بھی  کیا  سکتا  تھا!  رفیق  اور  ناصرہ  کا آپس  میں   بظاہر  تو  کوئی  تعلق  تھا نہیں ،  بس  بچپن  سے  ایک دوسرے  کے  ساتھی  تھے، لیکن  یوں ہی  کسی  تعلّق  کا   ٹوٹ  جانا  بھی  تو  کوئی  مناسب  بات  نہیں  تھی۔  کم از کم  اُس  سے  پوچھ  تو  لیا  جاتا!  کیا  پوچھ  لیا  جاتا،  اِس  کا  اُسے  کوئی  علم  نہیں  تھا۔

اور  آج   اُس  نے  ناصرہ  کو،  اُس  کے  والد  کے  یقین  کے  مطابق  ، یوں  دیکھا  تھا جیسے  اُُس  کے  خالق نے  اُسے  بنایا  تھا    اور  وہ  تخلیق  اُسے  بہت   پسند آئی  تھی۔  کچھ  دیر  کے  بعد  رفیق  کی  نبض  پھر معمول کے  مطابق  چلنے  لگی۔ اُس  نے  پیشانی  سے  پسینے  کو  خشک  کیا،  اور  گھڑی  کی   طرف  دیکھا۔  پونے   چار  بج  رہے  تھے۔  رفیق  جلدی  سے  اُٹھا  ، اپنی  حالت   ٹھیک  کی  اور   گاڑی  لینے  چل  دیا۔

سولینتونا  سے  ہوائی  اڈے  کا  راستہ  کوئی  بیس  منٹ  کا  تھا،  پر  آج     اُسے  آنے  جانے  میں  صرف چھتیس  منٹ  لگے تھے؛  کیونکہ  اتنی  صبح  سڑکیں  بالکل  صاف  تھیں۔رفیق   نے  قادر  کو  وہاں  پہنچا   تو  دیا  تھا  مگر  وہ  اُس  کے  پاس  ٹھرا  نہیں۔

جب  وہ  واپس   آیا  تو   ہر  طرف  ابھی  سناٹا   ہی چھایا  ہُوا    تھا۔  رات  کی  محفل  کی  بعد اتنی  صبح   کون اُٹھتا۔

وہ   چُپ  چاپ   مہمان خانہ  میں  واپس  آیا  اور  جوتے  اُتار کر  پلٹا   ہی  تھا  جب   ماضی   سے ایک  مانوس  مہک  اُس  کے  ذہن  پر  چھا  گئی۔  رفیق  نے    کمرے  کے  اندر  جھانکا۔  ناصرہ  اُس   کے  پلنگ  پر بیٹھی  ٹکٹکی  باندھے  اُسے  دیکھ  رہی  تھی۔

"یہاں  کیسے  آئیں؟"

"وہ    باڑ   میں  پرانے  والا  شگاف  اب  بھی  موجود  ہے،  اور  اِس  کمرے  کو  تو  تم  نے  کبھی قفل  لگایا   ہی  نہیں۔"

"یہاں  کیا  کر   رہی  ہو؟"

"تمہارا   انتظار اور  کیا۔"

"کیوں؟"

"چُھپ  چُھپ کر  جو  دیکھ  رہے  تھے میں  نے  سوچا  پاس  ہی  کیوں  نہ  آ  جاؤں۔"

"دماغ  خراب  ہو  گیا  ہے  کیا؟"

"جو  مجھ  پر  گزرتی  ہے  اُس  کے بعد  اگر  خراب  نہ  ہو  گا  تو  کیا  ہو  گا۔"

"کیا  مطلب؟"

"دو  سال   پہلے  میں  ایک  نادان لڑکی  تھی۔ پھر  مجھے  دھوکے  سے  ملتان  لے  جایا  گیا،  اور  اِس  سے  پہلے  کہ  میں  کچھ  کہہ  پاتی  میں  کسی  کی  بیوی  بن  کر  اُس  کے  بستر  میں  تھی۔ سویڈن  میں   جو  کچھ اپنے   حقوق  کے  متعلّق سیکھا  تھا  ایک  رات  میں  وہ  سب  حقوق  مجھ  سے  چھِن  گئے  اور      مجھے   بالکل  نئے  فرائض  اور  گُر  سِکھائے  گئے۔"

"کون  سے  گُر؟"

اُس   نیم تاریک  کمرے  میں  بھی  رفیق  کو  ناصرہ  کی  آنکھوں  کی  چمک  نظر  آ  رہی  تھی۔  وہ  بڑے  آہستہ  سے  پلنگ  سے  اُٹھی  اور   اپنی   چادر    کوگِرا  کر  اُس  نے سِر  پر چنّی  ٹھیک  کی۔ ناصرہ    نے  اب  صرف  وہ  چنّی  ہی  پہنی  ہوئی  تھی۔

"وہ  مجھے  کہتے  ہیں  کہ  تم  اب  غیر  ہو  چُکے  ہو۔ اور  سُنا  ہے  کہ  روایت   یہی   ہے کہ اگر  غیر  کا  سامنا    ہو  جائے تو  سر    اور چہرہ  ڈھانپ  لینا  چاہئے۔"

رفیق  کا  سر  ہی  نہیں  سب  کچھ  چکرا   رہا  تھا۔  نہ  صرف  اُسے  سانس  لینے  میں  دشواری   ہو رہی  تھی بلکہ  لگ  رہا  تھا کہ  اُس  کے  سارے  کپڑے  بھی  سکڑ  گئے  ہوں۔ ناصرہ  نے  بڑھ  کر   اُس  کی  پہلے  تو  قمیض  اتاری  اور بھر  باقی  سب  کچھ۔

"یہ  کیا  کر رہی  ہو؟"

"خود ہی  تو پوچھا  ہے  کہ  کون  سے  گُر،  اب  بچھلے  دو  سال  میں   جو  کچھ  سیکھا ہے   اُس  کی  تفصیل  تمہیں  بتاؤں  گی۔"

اگلے   دو  گھنٹوں  میں  رفیق  زندگی  کے  اُن  گہرائیوں   سے  گزرا  جہاں  کبھی  تو  نیچے  کی  زمین  کانپی،  کبھی   پسینے  کی ندیاں بہیں اور  کبھی   اُگلتا  ہُوا     لاوہ   پھوٹا  ۔  سفر  طے ہو  جانے  پرجب  دونوں  اپنی  اپنی  منزل  پر  پہنچ  گئے  تو  ایک  دوسرے  کے  ساتھ  لیٹے  دِلوں کے  دھڑکن  سُنتے  رہے۔

سکوت  کی  ایک لمبی  گھڑی  کے  بعد  بہت  دھیمے  سے  ناصرہ  بولی، " اب  میں  بھی  آنکھیں  بند  کر  سکوں  گی۔"

"کب؟"

"جب  بھی  تمہیں  اپنے  پاس  چاہوں۔"

رفیق  نے  تعجبُّانہ  نظروں سے  ناصرہ  کو دیکھا۔

"کیا  تمہیں  علم  ہے  کہ  ایک  اجنبی  کے  نیچے  لیٹنا  کیسا  لگتا ہے؟"

رفیق  نے  انکار  میں  سر  کو  ہلایا۔ پھر  کہا، "کیا  قادر  تمہارے  لئے   اب  بھی  اجنبی  ہے؟"

"اجنبی  ہے اور  ہمیشہ  اجنبی رہے  گا۔    اُس  نے  سویڈن  آنے  کے  بعد  پہلی  مرتبہ  میرا  نام  لیا  ہے۔ ملتان  میں  میرا   نام  نمبر  تین  ہے۔"

"نمبر  تین؟"

"ہاں  نمبر  تین۔  میں  اُس  کی تیسری  بیوی  ہوں۔  شادی  کی  رات بھی  اُس  کی  بیویاں  وہاں  موجود  تھیں  اور  دونوں  نے  مِل  کر  ہماری  پوری مدد کی  تھی۔"

"پوری مدد۔  کیسی  پوری مدد؟"  ناصرہ  کی  باتیں  رفیق  کی  سمجھ  سے  باہر  تھیں۔

ناصرہ  کھِل کِھلا  کر  ہنس  پڑی۔  "ہمیشہ  بدھو  تھے  اور  اب  بھی  وہی  ہو! یہ  کھڑکی میں    رات  کو  کیوں  کھڑے  تھے؟

"تم  نے  اتنا اُُدھم جو  مچایا  ہُوا  تھا۔  یہ  سب  ہائے  وائے  کی  کیا  ضرورت  تھی؟"

"کرنی  پڑتی ہے ورنہ  صاحب  کی  تسلّی   نہیں   ہوتی۔"

"کیا   تمہیں  شرم  نہیں  آتی  کہ  کوئی  سُن  لے  گا؟"

"بدھو  میاں  ،سنانے  کے  لئے  تو  یہ  سب  کچھ  کرنا  پڑتا  ہے۔  اور  شرم  کیا  کروں؟    ہمارے  میاں  صاحب   اپنی   تینوں  بیویوں سمیت  حویلی  کے  ایک  بڑے   کمرے  میں  سوتے  ہیں۔ اور  ہمارے  میاں  جی  کو  سب  سنّتوں میں  سے  ایک  ہی  سنّت  سب  سے  زیادہ  پسند  ہے۔ اِس  لئے  میں  یہ ہائے وائے  ہر  رات  سنُتی  بھی  ہوں  اور  سنُاتی  بھی  ہوں۔ "

"یہ  آنکھیں  بند  کرنے  والی  کیا   بات  تھی؟"

"ہاں وہ    تو  میں  بھول ہی  گئی۔ میں  ملتان  میں  کسی  کوخاص   نہیں  جانتی  تھی،  سوائے  خالہ  حمیدہ  کے۔  یاد   ہیں  تمہیں  خالو  اور  خالہ  حمیدہ؟  وہ  جو  واپس  چلے  گئے  تھے۔  میں  اُنہیں  بچپن  سے  جانتی  ہوں۔"

ایک  بھاری  بھرکم  صاحب  اور  اُن  کی  نازک  سی  بیوی  کی  تصویر  میرے  ذہن  میں   اُبھری۔

"یاد   ہیں،  وہی  جو  ہمیشہ  تسبیح  پھیرتی رہتی   تھیں۔"

"بالکل  وہی، اور  معلوم  ہے  وہ  تسبیح   کیوں  پھرتی  تھیں  ؟   خیر  چھوڑو  اِسے؛  بیاہ  کے  چند  ہفتے  بعد  جب  میں اُن  سے  مِلی  تو  میں  نے  انہیں   اکیلے  میں اپنی  حقیقت  بتائی،  اور  پوچھا  کہ  کیا  وہ  میری  کوئی  مدد کر  سکتی  ہیں۔"

"کیا  کہا  اُنہوں   نے؟"

" پہلے  تو  وہ  کسی  گہری  سوچ  میں  چلی  گئیں پھر  کہا   " بِٹیا   جِس    کے چنگل  میں  تم  پھنس  گئی  ہو  اُس  سے    تو یہاں   اب  کوئی چھٹُکارہ  ممکن  نہیں،  لیکن  میں  تمہیں  یہ  سکِھا  سکتی  ہوں  کہ  تم  اپنی   دُکھ  کو  کیسےسُکھ   میں  بدل  سکتی  ہو"  وہ  کیسے؟  میں  نے  فوراً  پوچھا   تھا۔  "آنکھیں  بند کر  کے!"   آنکھیں  بند  کر  کے؟  میں  نے  تعجّب  سے  پوچھا۔   "ہاں  بیٹی  آنکھیں  بند  کر  کے۔  ہم  عورتیں  سال ہا سال  سے    اِن  مردوُد     مردوں  کی   انا      کی  تسلی  کے  لئے  استعمال  ہوتی آ   رہی   ہیں۔ بڑے  بڑے   خبیث  لوگ  جنہیں   اپنی  مردانگی  پر  بہت  مان   تھا   انسانیت  کی  سب  حدود  توڑ  کر   کم سن  کلیوں  کو  اپنے  پاؤں  تلے   جماع بِل  جبر  کے  دوران   کچلتے   چلے  آ  رہے  ہیں۔  اِن  ظالموں  کو  کوئی  فرق  نہیں  پڑتا  کہ  کوئی  لڑکی  اُن  کے  قریبی  دوست  کی  بیٹی  ہو،  اپنے  منہ  مانگے  حبیب  کی  بیوی  ہو،   کسی  مقتول  کی  نوبیوہ      ہو   ،گلی  میں  کھیلتی  بچّی  ہو  یا  چھٹیوں  پر  آئی  ایک  معصوم   لڑکی  ہو؛ بس  کسی  بہانے  وہ اِن   کے  نیچے  بچِھا   دی  جائے۔ لیکن  یہ  احمق  یہ  نہیں  جانتے  کہ  کسی انسان  کے  جسم  کو  تو  خریدا جا  سکتا  ہے، مگر  کسی  کے  پیار  کو  تو    یوں  جیتنا   مُمکن   نہیں۔  پیار تو  وہیں  جاگتا  ہے  جہاں  آنکھ  سے  آنکھ  ملنے  پر  پسینہ  آ  جائے۔  وہ  لڑکیاں  خوش  قسمت  ہوتی  ہیں  جو  اپنی  زندگی  کا ساتھی خود  چُن  سکیں،  یا    پھر  اُنہیں کوئی  ایسا  ساتھی  مِل  جائے  جِسے  دیکھ  کر   اُن  کی نبض      تیز  ہو  جائے،  ورنہ   ہمارے    یہاں  اکثر مالی   مجبوری  کے  تحت  یا   رشتہ داری   کے  چکر  میں  بہت سی لڑکیوں  کو  جانوروں   کی  مانند اُن   مردوں   کے  ہاتھ دے   دیا  جاتا  ہے جِن  سے  اُنہیں  کراہت  ہوتی  ہو۔    گو  آج   تک  کسی  کو  میں    مِلی  تو   نہیں مگر  بیٹی  سنُا   ضرور ہے  کہ  اِس  دنیا  میں  ایسے انسان  دوست   مرد  بھی  ہوتے   جو  اپنی    بیوی   کومحض  اپنے  بستر  کی زینت بنانے   کی  بجائے   اُسے  زندگی  کا  ساتھی بناتے  ہیں،  لیکن   مجھے  نہیں  یقین  کہ  تمہارا   مرد    یہ  انسان  دوستی   والی   تہمت  برداشت  کرے  گا۔""

"لیکن  اِس  تمام  گفتگو  کا   آنکھیں  بند  کرنے  سے کیا  تعلّق؟"  رفیق  نے  ناصرہ  کی  بات  کاٹ  کر  پوچھا۔

"بتاتی  ہوں۔ میں  نے  بھی  یہی  سوال  حمیدہ  خالہ  سے  کیا  تھا۔  انہوں  نے  کہا  تھا  "بیٹی  جب  تمہارا  میاں تمہیں  اپنی  مردانگی  دِکھا    رہا ہو  تو    تم  اپنی  آنکھیں  بند  کر  کے  اپنے  کسی  پیارے کے  ساتھ  تصوّر  کے  باغیچہ   میں نکِل  جایا    کرو۔  وہ  لعنتی   جو  بھی  جوش  دِکھائے اُسے  دِکھانے  دو،   پر  تم  تو  اُس  کی زد  سے  باہر   نکل  کر اُس  کے مشقّت   کو  اپنی مسرّت  میں  ڈھال  سکتی   ہو۔ دیکھو ناصرہ،  کسی  کی  جبری گرفت  سے  جیسے  بھی  ممکن  ہو  فرار  لازم  ہے۔  سسک  سسک  کے  جینا   یا   جیتے  جی  مر  جانا   خود  اپنے  پر  ظلم  کرنا  ہے۔ بات یہ  نہیں  کہ  بستر  میں  تمہارے  ساتھ  کون  ہے، بلکہ تم  کِس  کی  صحبت  میں  ہو!"  خالہ  حمیدہ معلوم نہیں  کب کا  غبار    اپنے  دِل  سے جھاڑ   رہی تھیں  لیکن جب  مجھ  سے رہا  نہیں گیا  تو  میں  نے  خالہ  سے  پوچھا،  کیا  آپ  کا  بھی  کوئی  پیارا   تھا، کیا  آپ بھی  آنکھیں  بند  کرتی  ہیں؟  کچھ  جھجک   کے  بعد  جواب  مِلا "ہاں  بیٹی  میں  بھی  انکھیں  بند  کرتی  ہوں،  اور  وہ   جو  تسبیح  چلاتی ہوں تمہارا  کیا  خیال  ہے  کہ  میں  کِس  کا  نام  جپتی  ہوں؟""

 

کمرے  پر  مکمل  سناٹا  چھا  گیا۔  پھر  ناصرہ  بولی "وہاں آج  تک  تو  میرا  کوئی  ایسا  پیارا  نہیں  تھا  جِس  کے  ساتھ  میں  باغیچے  میں نِکل   جاتی، لیکن  آج   رات کے  بعد میں  بھی  آنکھیں  بند  کر سکوں  گی!"

 خاموشی  کا  ایک  اور  دور  چلا۔

پھر  ناصرہ   اُٹھ    کر   بیٹھ  گئی  اور  رفیق  کی  آنکھوں  میں  آنکھیں  ڈال  کر  بولی "رفیق  ،سنگم  تو  ہمارا   ہونا  چاہیے  تھا  جو   ایک دوسرے  کے  دُکھ  سُکھ، چاہت  اور  کراہت  کو  جانتے  ہیں  ؛  لیکن  مجھے  تو   بیچ  دِیا  گیا۔"

"کیا  بیچ  دِیا  گیا!  اب  تو  تم  سویڈن  میں  ہو،  کیوں  نہیں  اپنی  آزادی  واپس  لے  لیتی  ہو۔  یہاں  تو  قادر  کی تمہارے   پر  کوئی  گرِفت  نہیں۔"

"ہے! میرا    بچّہ    وہیں   ہے  اور   مجھے  اپنے    ابّو  کے   پرانےقرضے بھی   اتارنے  ہیں،  ورنہ  ہمارے   دیہات  میں  ہمارے  بہت  سے  رشتہ  داروں  پربربادی   آ  جائے  گی!"

"تو  پھر  قادر  سے  پیار  کیوں  نہیں  کر  لیتی ہو؟"

"پیار  کسی  سے  کیا  نہیں جاتا،    ہو  جاتا  ہے؛  اور  قادر  کے  پاس  کسی کے  پیار  کے  لیے  کوئی  جگہ  نہیں۔  وہ  تو  کاروبار  کرتا  ہے۔  اُسے  تو   بس  خریدنا  اور  استعمال  کرنا  ہی آتا  ہے۔"

کچھ  دیر  سناٹا  رہا   پھر  ناصرہ  بولی، "پر میں  ثابت  کروں  گی  کہ اِس مرتبہ   جو  اُس  نے  خریدا  تھا  وہ  گھاٹے  کا  سودا  ہے۔"

"کیسے؟"

"اگر  تمہاری   آج  رات  کی  محنت  کا  پھل  مِلا  تو تم  میرے  پاس  جسمانی  طور  پر  بھی  رہو  گے،  ورنہ  جب  کبھی  قادر  نے مجھے  چھُوا   تو میں  فوراً     آنکھیں  بند  کر کے  تمہیں  بُلا  لُوں  گی۔"

  پھر جاتے  ہُوئے    ناصرہ  نے  وعدہ  کیا:

"اور جب  کبھی  مجھے  موقع  مِلا  میں  تسبیح  پر  تمہارے  نام  سلام  اور  اُس  کےنام  پر  لعنت بھیجوں  گی۔"